بوتوكس للأسنان؟​

لما تقومين من النوم الصبح تحسين بشوية ألم في منطقة الفك لما تتنرفزين وتعصبين تطلعين اصوات من كثر الضغط على اسنانج..ترصين على اسنانج بحيث ممكن تتكسر. متزوجة وزوجج يقولج مانمنا من الصوت اللي تطلعينه باسنانج شوي وبتكسرينهم حاسة إن ويهج شكلة مربع ووايد عريض من تحت بس مافيج تراكم للدهون

 ‎كل هذه الاعراض اذا صارت لج .. تستشيرين فيها طبيبين : طبيب الاسنان اللي تراجعين عنده وتسوين عنده تنظيف الاسنان الدوري ، وطبيب التجميل اللي تسوين  عنده البوتوكس او الفيلر .. المساعدة من طبيب الاسنان بتكون على شكل ( النايت قارد)  وهو عبارة عن قطعة  شفافة تلبسين فيها اسنانج كل ليلة عشان تحمينهم من الضغط المستمر  والكسر والتآكل

المساعدة عند طبيب التجميل هو عبارة عن حقن البوتوكس في العضلة الماضغه اللي تساعدنا على العض ومضغ الطعام .. نحقن هذه العضلة بجرعات معينة من البوتوكس .. شو يصير بعدين ؟ .. بعد كم اسبوع بتلاحظين ان المشكلة خفت ماقمتي وايد تعضين وتضغطين حتى الألم أول ماتنشين خف وحتى الآم الرقبة اذا كانت موجوده لحد ما بتخف … والاحلى ان الجزء الاسفل من الوجه يطلع اضعف .. لان العضلة نامت وارتخت بالبوتوكس .. وهذا الاجراء من  مفضلاتنا في استيلازا

‎نسيت اخبركم شي بعد مهم : بعد مانحقن البوتوكس في العضلة الماضغة .. المفعول يبدأ بعد اسبوعين إلى ٤ اسابيع .. وبعدها بتلاحظون شي ان المضغ عندكم ممكن يكون أضعف شوي بس الجسم يعوض هذا الضعف إنكم تستخدمون عضلات الوجه الثانية في عملية المضغ .. فممكن يصير عندكم شوية صداع في أول فترة .. بس  ماراح يكون مانع مقابل إني احافظ على اسناني وفي نفس الوقت طلعت ويهي بشكل انثوي ورشيق اكثر